पोखरा नगर रेष्टुरेण्ट तथा बार एशोसिएशन (सिटी रेबान) ले आयोजना गरेको तेस्रो सिटी रेवान महोत्सव तथा फुड फेष्टिबल पाचौं दिनसम्म जारी छ । महोत्सव को पाँचौ दिनसम्ममा करिब चालिस हजार दर्शकले महोत्सव अवलोकन गरेका छन् । पोखराको खेलकूद विकासमा महत्वपूर्ण योगदान दिने उद्देश्यका साथ आयोजित महोत्सवमा लोक दोहोरी, हाँस्य प्रहसन, लाइभ पप कन्सर्ट र बाल उद्यान रहेको सिटी रेवानका महासचिव एवं प्रचार–प्रसार संयोजक दिपक तिमिल्सिनाले गोल्डेन न्यूज दैनिकलाई जानकारी दिए । महोत्सवमा मंगलबार विवाहित गृहणी नृत्य, विवाहित एकल पुरुष नृत्य, दर्शक र कलाकारबीचको दोहोरी लगायत लोकदोहोरी प्रतियोगिता दर्शकको भिड थियो । मंगलबार भएको लोकदोहोरी प्रतियोगितामा पर्वतलाई पराजित गर्दै रुपन्देही अघिल्लो चरणमा प्रवेश गरेको छ । सिटी रेवान सामाजिक र सेवामूलक संस्था भएकाले संस्थाले आयोजना गरेको महोत्सव एकपटक अवलोकन गरि सहयोग गरिदिन महासचिव तिमिल्सिनाले पोखरेलीलाई आग्रह गरेका छन् । उनका अनुसार शुक्रबारदेखि शुरु भएको महोत्सव कात्तिक २२ गतेसम्म चल्ने छ । महोत्सवमा दर्शकलाई नयाँ स्वाद दिनका लागि विवाहित पुरुषवीच नृत्य प्रतियोगिता, लोकल कुखुराको झोलसँग ढिडो खाने प्रतियोगिता, लमजुङको ठाडो भाका, हास्य प्रहसन जस्ता कार्यक्रम थप गरिएको छ । लोकल कुखुराको झोलसँग ढिंडो खाने प्रतियोगिता २० गते गरिंदैछ । महोत्सवको छैटौं दिन बुधबार लोक दोहोरीतर्फ प्रजापति पराजुली, पुरुषोत्तम न्यौपाने, राधिका हमाल, तारापति सुवेदी, घनश्याम रिजाल, शिवहरि ढुङ्गाना, ज्योती लोहनी, इन्द्रा गुरुङ, आयुष परियार र लाइभ पप कन्सर्टतर्फ रजनी राई, विनोद बाँनिया, ओम गुरुङको प्रस्तुती रहने आयोजकले जनाएको छ ।
Post a Comment