पोखराको चिप्लेढुङ्गामा प्रधान कार्यालय रहेको सिटी डेभलपमेण्ट बैंक लिमिटेडले सामाजिक उत्तरदायित्व बहन गर्ने क्रममा कास्की ल्वाङघलेल गा.वि.स.स्थित बाराही निम्न माध्यामिक विद्यालयलाई १ थान कम्प्यूटर सेट हस्तान्तरण गरेको छ । लायन्स क्लब अफ पोखरा लेकसिटीको सक्रिय सहयोगमा उक्त विद्यालयलाई कम्प्युटर प्रदान गर्नका लागि भौगोलिकता र भौतिक पूर्वाधारको आधारमा छनौट गरिएको थियो । कार्यक्रममा नेपाल उद्योग वाणिज्य महासंघका पूर्व अध्यक्ष आनन्दराज मुल्मीले बिद्यालयका शिक्षकलाई कम्प्युटर हस्तान्तरण गरेका थिए । विगत सात वर्षदेखि समय सापेक्ष प्रविधिहरुको प्रयोग गर्दै, सुरक्षित आधुनिक तथा ग्राहकमुखी बैंकिङ्ग सेवा प्रदान गरिरहेको सिटी डेभलपमेण्ट बैंकले २०७१ असार मसान्त सम्ममा रु ४ अर्ब ६ करोड निक्षेप संकलन तथा रु ३ अर्ब १८ करोड कर्जा लगानी गरी रु. १५ करोड ७० लाख संचालन मुनाफा आर्जन गरेको छ । ग्रामीण भेकलाई प्रमुख कार्यक्षेत्र बनाई महिला, पिछडिएका वर्ग तथा युवाहरुमा लक्षित बैंकिङ्ग कार्यक्रम तथा लघुवित्त कार्यक्रम समेत संचालन गरिरहेको सिटी डेभलपमेण्ट बैंकले आगामि दिनमा नेपाल राष्ट बैंकका मार्ग निर्देशनहरुलाई पालना गर्दै अझ विश्वसनीय तथा प्रभावकारी सेवा प्रदान गर्ने जनाएको छ ।
बैंकले प्रधान कार्यलय चिप्लेढुङ्गाका साथै ट्याक्सीचोक बगर, अमरसिंहचोक पोखरा, मिलनचोक हेमजा, भिमाद बजार तनहुँ, भोटेओडार लमजुङ, दमौली तनहुँ, नागडाँडा कास्की, तुरतुरे तनहुँको साथै नेपालको दुर्गम जिल्ला मानिने मनाङको चामेबजार, लेखनाथको शिशुवा, चितबनको नारायणगढ र बाग्लुङ को महेन्द्रपथ गरी जम्मा १३ शाखा मार्फत बैंकिङ सेवा सञ्चालन गर्दै आएको छ ।
Post a Comment