सरकारद्वारा १२ मुलुकका लागि प्रस्तावित राजदूतको नाम ब्यवस्थापिका संसदको संसदीय सुनुवाइ समितिले बुधबार सर्वसम्मत अनुमोदन गरेको छ । समितिमा सोमबारदेखि तीन दिनसम्म सुनवाइ भएको थियो । समितिले प्रस्तावित १२ जनाको नाम सर्वसम्मत भएको जानकारी बुधबारै परराष्ट्र मन्त्रालयलाई गराएको छ । प्रस्तावितमध्ये म्यानपावर व्यवसायसँग जोडिएका ओमनका लागि प्रस्तावित शर्मिला पराजुली र कतारका लागि प्रस्तावित रमेश कोइरालाका साथै २०४६ को जनआन्दोलन दबाउन दोषी देखेको भनेर मल्लीक आयोगले सिफारिस गरेकोबारे इजरायलका लागि प्रस्तावित निरन्जन थापाविरुद्ध उजुरी परेको थियो । तर उनीहरुको संलग्नताबारे कुनै छानविन नगरी समितिले अनुमोदन गरेको छ । ‘कुनै नाममा पनि विवाद देखिएन, सबैको सहमतिमा अनुमोदन गरेका हौं,’ विशेष सुनुवाई समितिका सभापति कांग्रेस सांसद कुलबहादुर गुरुङले भने ।
१२ राजदूतमा पराजुली, कोइराला र थापासहित डा. विश्वम्भर प्याकुरेल (श्रीलंका), अर्जुनजंगबहादुर सिंह (दक्षिण कोरिया), प्रतिभा राणा (जापान), युवनाथ लम्साल (डेनमार्क), लक्की शेर्पा (अस्ट्रेलिया), चोपलाल भुषाल (बंगलादेश), पदमदास सुन्दास (बहराइन), भीमकृष्ण उदास (म्यानमार) र महेन्द्रप्रसादसिंह राजपुत (साउदी अरेबिया) छन् ।
सरकारले सुरुमा स्पेनमा नयाँ दुतावास खोल्नेसहित १४ मुलुकका लागि नाम सिफारिस गरेको थियो । विवादित ब्यक्ति भन्दै आशा लामा (युएई) र पराजुली (ओमान) को नाम फिर्ता लिए पनि पराजुलीलाई पुन समावेश गरियो । स्पेनमा दूतावास खोलेपछि मात्र सुनुवाईमा पठाउने भन्दै सरकारले भरत रायमाझीको नाम भने समितिमै पठाएन ।
Post a Comment