एमालेका पूर्व जनप्रतिनिधि परियारको निधन

गोल्डेन न्यूज संवाददाता

नेकपा एमालेका सक्रिय कार्यकर्ता सुन्दर बहादुर परियारको मंगलबार निधन भएको छ। कास्कीको साविक कृष्ति गा.वि.स. चुरेटा गाउँका ७१ वर्षिय परियारको उपचारको क्रममा निधन भएको हो । स्व. परियारको पार्थिक शरीरमा नेकपा एमाले जिल्ला कमिटी कास्कीका सचिव दामोदर बैरागीले पार्टीको झण्डा ओढाएर सम्मानका साथ अन्तिम श्रद्धाञ्जली व्यक्त गरेका थिए । उक्त अवसरमा नेकपा एमाले क्षेत्र नं. ३ का अध्यक्ष धन बहादुर नेपाली, नेकपा एमाले गण्डकी पूर्व सल्लाहकार लेखनाथ शर्मा, नेकपा एमाले जिल्ला निर्वाचन कमिटी सचिब झपट रानाभाट, नेकपा एमाले क्षेत्र नं. ३ का सचिवालय सदस्य भक्त भुजेल, पोखरा नगर समन्वय कमिटी सदस्य पूर्णबहादुर थापा, पोखरा ९ अध्यक्ष प्रकाश शर्मा, साविक कृष्ति, हाल पोखरा–२४ का अध्यक्ष दिपक सुवेदी, स्व.परियारका आफन्तहरु लगायतको सहभागिता रहेको थियो ।  स्व. परियार २०५४ सालको जनप्रतिनीधि साथै नेकपा एमालेको इमान्दार, सरल र सक्रिय कार्यकर्ता थिए । उनका २ श्रीमती, ५ छोरा, २ छोरी र १६ जना नाति–नातिना छन्। यसैबीच नेकपा एमाले साविक कृस्ति, हाल पोखरा २४ वडा कमिटीले बुधवार नै शोक विज्ञप्ति जारी गर्दै स्व.परियारको निधनप्रति गहिरो दुःख प्रकट गरेको छ ।  नेकपा एमाले साविक कृष्ति, हाल पोखरा २४ वडा कमिटीका अध्यक्ष दिपक सुबेदीले जारी गरेको विज्ञप्तिमा स्व.परियारको निधनले सिङ्गो पार्टीलाई क्षति पुगेको उल्लेख गरिएको छ । विज्ञप्तिमा दिवंगत आत्माको चिरशान्तिको कामना गर्दै शोक सन्तप्त परिवारजनमा समवेदना प्रकट गरेको छ ।