गोल्डेन न्यूज संवाददाता
फेवा ताललाई कुरुप बनाउने जलकुम्भी झारबाट मुक्ति पाउने उपाय स्वरुप त्यस्तो झार हटाउने ब्यबहारिक मेशिन निर्माण पश्चिमाञ्चल क्याम्पस लामाचौर पोखराका विद्यार्थीहरु जुटेका छन् । बर्खाको समयमा जलकुम्भीले फेवा ताल नै ढाक्दा ताल कुरुप भई पोखराकै आकर्षणमा धक्का लागेको भन्दै विद्यार्थीहरु जलकुम्भी झार हटाउने उपकरण निर्माणमा जुटेका हुन् । त्यस्तो मेशिनको नमुना भने यसअघि नै निर्माण गरी इञ्जिनियरिङ अध्ययन गर्दै गरेका विद्यार्थीले परीक्षण समेत गरिसकेका छन् । पोखरामा आइतबार आयोजित कार्यक्रममा उनीहरुले उक्त मेशिनको भिडियो प्रोजेक्टर मार्फत देखाएका थिए । त्यस्तो मेशिन निर्माण गर्न ३७ लाख देखि ४२ लाख रुपैयाँ सम्म पर्ने निर्माणकर्ता टोलीका प्रमुख अशोक लम्सालले बताए । सौर्य प्रणाली, जेनेरेटर वा एसी ग्रिड कुन प्रणालीमार्फत उत्पादित इन्धनले उक्त मेशिन चलाउने भन्ने विषय अनुसार त्यस्तो लागत निर्धारण हुने उनले सुनाए । पश्चिमाञ्चल होटल संघ पोखराले आइतबार आयोजना गरेको कार्यक्रममा बीई अध्ययन गर्दै गरेका १० जना विद्यार्थीको टिमले पोखराका पर्यटन व्यवसायी सामू उक्त मेशिन आफूहरुले निर्माण गर्न सक्ने तर लागतको अभाव भएको भन्दै त्यस्तो लागत उपलब्ध गराउन आग्रह गरेका थिए । यो मेशिनले एक घण्टामा १२ हजार किलो जलकुम्भी झार संकलन गर्न सक्ने दाबी विद्यार्थीहरुको रहेको छ । सफा लेक नाम दिइएको उक्त उपकरणलाई प्याडल ह्वील, कटर, फ्ल्यापर, कन्भेयर, कन्टेनर र हलको मद्दतले निर्माण गर्न सकिने कार्यक्रममा प्रस्तुति गरिएको थियो । ताल माथिको पानीमा तैरिएको उपकरणलाई चालकले चलाउने, अगाडिको जलकुम्भीलाई कटरले काटेर फ्यापरको मद्दतले त्यसलाई कन्भेयर मार्फत उपकरणमा रहने दुई हजार किलो अटाउने कन्टेनरमा पुर्याउने प्रणाली विद्यार्थीहरुले देखाएका थिए । डब्लू आरसीका चीफ एसोसिएटेड प्रोफेसर नारायणप्रसाद गौतमले कलेजले यस्तो ब्यबहारिक उपकरण बनाउन विद्यार्थीलाई आवश्यक सहयोग गर्दै आएको र रकम उपलब्ध भए कलेजकै अगुवाईमा जलकुम्भी लगायतको झार हटाउने उपकरण केही महिनामा बन्न सक्ने बताए । पुल्चोक इजिनियरिंग कलेजका पूर्व डिन इन्जिनियर भरतराज पहारीले विद्यार्थीले सराहनीय काम गर्न लागेको बताउँदै त्यसका लागि आबश्यक बजेट जुटाउन आफूले पनि सहयोग गर्ने बताए । डब्लू आर सी मेकानिकल विभागका एसोशिएटेड प्रोफेसर रामप्रसाद पौडेलले झार फाल्ने उपकरण बन्न सके पोखराका अन्य तालमा भएको जलकुम्भी पनि हटाउन सकिने बताए । हरेक वर्ष हिउँदमा केही कम जस्तो देखिए पनि बर्खा याममा बढी देखिने जलकुम्भी झारले तालको स्वरुप बिगार्दै लगेको छ । फेवा ताल संरक्षणको नाममा दुई दर्जन बढी संस्थाहरु गठन गरिए पनि तालबाट जलकुम्भी झार हट्न नसक्नु दुर्भाग्य भएको पश्चिमाञ्चल होटल संघ पोखराका अध्यक्ष भरतराज पराजुलीले बताए । झार हटाउने उक्त उपकरण निर्माणमा आफूहरुले पुनः छलफल गरी सघाउने दिशामा अगाडि बढ्ने पनि उनले बताए । विद्यार्थीलाई हौसला प्रदान हुने र ब्यवहारिक रुपमै मेशिन निर्माण गर्न सके त्यो निकै फलदायी हुने भनाई उनको थियो । रेवान पोखराका अध्यक्ष गोपीबहादुर भट्टराईले कार्यक्रममा धन्यबाद ज्ञापन गरे । कार्यक्रको संचालन संघका महासचिव भेकेन्द्रकुमार श्रेष्ठले गरेका थिए ।
Post a Comment