सांसदले मानव तस्कर गरेकोप्रति छानविन हुने

नेकपा माओवादी केन्द्रले आफ्ना आठ जना सांसदले नक्कली कागजात र किर्ते गरेर नक्कली सहयोगी बनाई केही व्यक्तिलाई विदेश लैजान लागेका विषयमा आएको समाचारको सत्यताबारे छानबिन गर्न  तीन सदस्यीय समिति गठन गरेको छ । पार्टीको पोलिटब्युरो बैठकले पार्टी नेता अमिक शेरचनको नेतृत्वमा महासचिव कृष्णबहादुर महरा र प्रवक्ता पम्फा भुसाल रहेको छानबिन समिति गठन गरेको हो । प्रवक्ता भुसालले समितिलाई सात दिनभित्र छानबिनसम्बन्धी प्रतिवेदन तयार पारेर बुझाउन बैठकले निर्देशन दिएको जानकारी दिए । उनले समाचारमा आएजस्तै ती सांसदले नक्कली सहयोगी बनाएको हो वा होइन भन्ने विषयमा छानबिन गरिने बताए । सांसदहरु गोमा कुँवर, रुपा महर्जन, डोरप्रसाद उपाध्याय, सिर्जना खत्री, सन्तकुमार थारु, राममाया बोगटी, दीलमाया थामी र धना पहरीले नक्कली कागजातका आधारमा नक्कली सहयोगी बनाएर आठ जना व्यक्तिलाई स्पेन जान सिफारिस गरेको समाचार आएको थियो ।
बैठकमा सङ्गठनात्मक र निर्वाचन विधिबारे कार्यदलको प्रस्तुत प्रतिवेदनमाथि २२ जना पोलिटब्युरो सदस्यले धारणा राखेको प्रवक्ता भुसालले बताए ।
पार्टीको तल्लो तहदेखि केन्द्रसम्म पार्टी संरचना कस्तो बनाउने भन्ने विषयमा बैठक केन्द्रित रहेको उनको भनाइ छ । मङ्गलबारदेखि सुरु भएको बैठक बिहीबार ११ बजे बस्ने गरी बुधबार स्थगित भएको छ । रासस