यसैबीच धार्मिक तथा पर्यटकीय स्थल स्याङ्जाको आरुखर्क हाडीफोरेस्थित राम्चेदेवी मन्दिर परिषरमा भगवान गौतम बुद्वको शान्ति स्तुपा र भगवान शिवको निराकार ज्योर्तिलिङ्गको मूर्ति निर्माण गरिने भएको छ । राम्चेदेवी कृषि तथा पर्यटन विकास समितिले भगवान् गौतम बुद्वको आठौ प्रतिमुर्ति स्वरुपमध्य ज्योर्तिबुद्व शान्ति स्तुपा र शिव महिमाका १२ ज्योर्तिलिङ्ग मध्ये श्रेष्ठ मानिने अमरनाथ ज्योर्तिलिङ्गको मूर्ति स्थापना गर्न लागेको हो । त्यसले त्यसक्षेत्रमा धार्मिक पर्यटन प्रवद्र्वनमा टेवा पु¥याउने अपेक्षा गरिएको समितिका अध्यक्ष मेजर दिलबहादुर गुरुङले बताए । बुद्व जयन्तीको अवसर पारी बैशाख २१ गते सो निर्माण कार्यको शिलान्यास गरिने समितिका महासचिव अर्जुनकुमार पौडेलले जानकारी दिए । कार्यक्रममा सहभागि हुन बौद्व भिक्षु कालासाङ्ग लामा तथा सन्त शिरोमणि लोकानन्द स्वामी आउने छन् । कार्यक्रमका सहभागिताका लागि सवैलाई आव्हान गरिएको छ । राम्चेदेवी मन्दिर प्रसिद्व धार्मिक तथा पर्यटकीय क्षेत्र पञ्चासे पञ्चधाम जाने बाटोमा पर्दछ । यसैबीच यही वैशाख २१ गते यस वर्षको बुद्धजयन्ती भूकम्पका कारण दिवङ्गत हुने व्यक्तिको निर्वाण (मोक्ष) र घाइतेको शीघ्र स्वास्थय लाभको कामना गरी मनाइँदै छ । राष्ट्रिय बुद्धजयन्ती मूल समारोह समितिका संयोजक एवम् लुम्बिनी बौद्ध विश्वविद्यालयका उपकुलपति प्राडा नरेशमान वज्राचार्यका अनुसार राष्ट्रिय रूपमा मनाउने तयारी गरिएको बुद्ध जयन्तीको स्वरूप राष्ट्रिय विपत्तिका कारण परिमार्जन गरिएको छ । राष्ट्रिय विपत्तिको यस घडीमा सम्पूर्ण बौद्ध सङ्घसंस्थालाई पीडितलाई सहयोग गरी धैर्यधारण गर्ने, गराउनेतर्फ उत्प्रेरित गराउन आग्रह गरिएको उनले बताए । बुद्धजयन्तीलाई भव्यताका साथ मनाउन प्रधानमन्त्रीको प्रमुख आतिथ्यतामा टँुडिखेलमा गरिने भनिएको कार्यक्रम स्थगन गरिएको छ । बुद्धजयन्तीका दिन प्रार्थना गर्ने सार्वजनिकस्थल स्वयम्भूलगायत क्षेत्र भूकम्पका कारण प्रभावित भएको बज्राचार्यले बताए । उक्त दिन काठमाडौँको बौद्धमा एक घन्टा दिवङ्गतको मोक्ष र घाइतेको शीघ्र स्वास्थ्य लाभको कामना गर्न प्रार्थना कार्यक्रम राखिएको मूल आयोजक समितिले जनाएको छ । भूकम्पका कारण स्वयम्भूलगायत क्षेत्रमा भत्किएका संरचनाको पुनःनिर्माण एवम् त्यहाँको तत्काल संरक्षणमा जुट्न समितिले सरकारलाई आग्रह गरेको छ ।
Post a Comment