राहत नपाएको भुकम्प पीडितको गुनासो

यहि वैशाख १२ गते शनिबार नेपालमा गएको महाविनाशकारी भुकम्पका पीडितहरुका लागि राहत तथा रकम संकलनमा देश विदेशमा रहेका विभिन्न संघ संस्थाले तीव्रता दिएपनि भुकम्प पीडितहरुले भने आफूहरुले ७÷८ दिन बित्दा समेत केही नपाएको गुनासो समेत गरिरहेका छन् । विकट गाउँमा नभई यातायात सुविधा पुगेका गोरखाका हर्मी, छोप्राक, गाँखु, श्रीनाथकोट, जौवारी, हंसपुर लगायतका गाविसका स्थानीयबासीले आफूहरुलाई राहत नआएको बताएको पत्रकार घनश्याम पाण्डेले जनाएका छन् । केही स्थानीय बासीले भने राहत आएपनि निकै कम मात्र सामग्री आउँदा व्यवस्थापन गर्न नसकिएको समेत बताएका छन् । गोरखाको जिल्ला विपत व्यवस्थापन समितिले भने हरेक गाविसमा राहत सामग्री र उद्दार टोली पुगेको बताएको छ । मानवीय क्षति नभएका तर बस्ने घर भत्किएका स्थानहरुमा उत्खननको काम हुन सकेको छैन् । जौवारीका स्थानीयबासीले राजनीतिक दलका नेता तथा प्रशासनका कोही पनि आफूहरुको समस्या सोध्न नआएको बताएका हुन् । एक स्थानीयका अनुसार सरकारबाट एउटा गाविसका लागि १ सय वटा पाल आएकामा वडामा भाग लगाउँदा १० वटा जति पर्ने तर एउटै गाउँमा १ सय घर विनाश भएकाले उपयोगमा समेत समस्या थपिएको छ । कतिपय स्थानमा विवाद समेत भएको छ ।      कतिपय स्थानमा बाहिरबाट सहयोगीहरुले स्वतःस्र्फुत रुपमा राहत लिएर लानेहरुलाई वीच बाटोबाटै स्थानीयहरुले खोस्ने गरेका छन् । राहत सामन लिएर सयौं गाडीहरु सञ्चार सम्पर्क र पहुँचका आधारमा मात्र ती सामन सम्बन्धित ठाउँहरुमा गएका देखिन्छन् । गोरखाकै कतिपय विकट गाउँहरुमा अहिले पनि सञ्चार सम्पर्क र राहत सामग्री पुग्न नसकेको स्वयं गाविस सचिवहरु बताउँछन् । यसैगरी गत महाभुकम्पले  लेखनाथ नगरपालिका को वडा नं २, ३ र ६ मा करिब एक सय १८ घरमा क्षति पु¥याएको प्रारम्भिक तथ्याङ्क सार्वजानिक गरिएको छ । वडा सेवा केन्द्र अर्घौको पहल र राजनीतिक पार्टीका प्रतिनिधिको स्थलगत सर्वेक्षणबाट एक सय १८ घरमा क्षति पुगेको र त्यस मध्ये २४ वटा घरमा पूर्णरुपले क्षति पुगेको वडा सचिव लिलामणि भण्डारीले जानकारी दिए । यसैबीच आफ्नो वडाभित्र भुकम्पले क्षति पु¥याएका घर परिवारका लागि स्थानीय तह र राजनीतिक पार्टी प्रतिनिधिहरुको सक्रियतामा राहत संकलन गरि पीडित परिवारलाई वितरण गरिएको छ ।