शैक्षिक विकासमा सक्रिय हुन्छौं’

समाजका गरिब तथा विपन्न वर्गका बालबालिकाको अध्ययनको थलोका रुपमा परिचित सामुदायिक विद्यालयको भौतिक तथा शैक्षिक विकासमा सक्दो सहयोग गर्ने सभासद्हरुले सोमबार आयोजित एक कार्यक्रममा सामूहिक प्रतिबद्धता जाहेर गरेका छन् । कास्की जिल्लाको निर्वाचन क्षेत्र नंं ३ बाट संविधानसभामा प्रतिनिधित्व गर्ने सभासद्हरुले सोही क्षेत्र अन्तर्गत पोखरा १७ स्थित जानकी निमाविको अनुगमन तथा निरीक्षणका क्रममा सो प्रतिबद्धता व्यक्त गरेका हुन् ।
पूर्वराज्यमन्त्री तथा सभासद् तुलबहादुर गुरुङले विधिसंवत् गरिने विद्यालयको भौतिक तथा शैक्षिक विकासमा आफ्नोतर्फबाट आवश्यक सहयोग रहने बताउनु भयो । सभासद् विन्दा रानाले राज्यले शिक्षा क्षेत्रमा गरेको लगानीअनुरुप प्रतिफल प्राप्त हुन नसकेको बताउँदै गुणस्तरीय शिक्षामा जोड दिन आग्रह गरिन् । अर्का सभासद् तेजकुमारी पौडेलले सामुदायिक विद्यालयको विशिष्टिकरणको खाँचो औँल्याइन ।
विद्यालयका प्रधानाध्यापक श्यामप्रसाद शर्माले आर्थिक अभावका कारण अलपत्र परेको नयाँ पक्की भवन सम्पन्न गर्न आवश्यक रु १६ लाख रकम जुटाइदिन सभासद्त्रयलाई आग्रह गरिन् । जोखिमपूर्ण पुरानो भवनमा कक्षा सञ्चालन गरिँदै आएको छ । विसं २०३५ मा स्थापित सो विद्यालयमा हाल १८१ विद्यार्थी र ११ जना शिक्षकशिक्षिका अध्ययन अध्यापन गर्दै आएका छन् । कक्षा १ देखि ३ सम्म अङ्ग्रेजी माध्यममा पढाइ सञ्चालन गरिएको छ ।