एमालेमा छलफल

नेकपा (एमाले) को बुधबार बसेको केन्द्रीय कमिटी बैठकमा नवौँ महाधिवेशनबाट पारित राजनीतिक दस्तावेज, सङ्गठनात्मक प्रस्ताव र विधान संशोधनको प्रस्तावसम्बन्धी कार्यदलको प्रतिवेदन केन्द्रीय सदस्यहरूलाई वितरण गरियो ।  मङ्गलबारदेखि एमाले पार्टी कार्यालय बल्खुमा केन्द्रीय कमिटीको दोस्रो पूर्ण बैठक बसिरहेको छ । प्रतिवेदन वितरणपछि अध्ययनका लागि एक दिनको समय दिँदै आजको बैठक सकिएको एमाले उपाध्यक्ष अष्टलक्ष्मी शाक्यले बताइन । उनँले आज बस्ने बैठकमा सो प्रतिवेदनलाई अन्तिम रूप दिन  केन्द्रीय सदस्यबाट सुझाव लिने काम सुरु हुने जानकारी दिइन ।  यही साउन २ गतेको पहिलो बैठकले महाधिवेशनबाट पारित राजनीतिक प्रतिवेदन, सङ्गठनात्मक प्रस्ताव र विधानलाई महाधिवेशनको निर्णयअनुरूप सम्पादन गरी केन्द्रीय कमिटीको दोस्रो बैठकमा प्रस्तुत गर्न दुई कार्यदल गठन गरेको थियो ।