पोखरा २० साउन ।कपडा व्यवसायी एशोसिएशन पोखराका पदाधिकारी एवं सदस्यहरु चीनको भ्रमण पूरा गरि पोखरा फर्किएका छन् । कपडा व्यवसायीको टोली यहि श्रावण ५ गते चीन प्रस्थान गरेको थियो । भ्रमण टोलीले चीनको राजधानी वेइजिङ, वेइजिङको ग्रेटवाल, समर प्यालेस, मानवनिर्मित कुनमिन लेक, स्यानमेन स्क्वायर, ओलम्पिक रङ्गशाला, रेशमी धागो उद्योग, बर्खे दरवार, ऐतिहासिक संग्रहालय लगायतका क्षेत्र अवलोकन गरे । यसैगरी टोलीले सांघाई, सांघाइको १२७ तले टावर चढेर विभिन्न स्थानहरुको अवलोकन गरे । उक्त टावर विश्वकै दोस्रो ठूलो टोवर हो । भ्रमण टोलीले सांघाइस्थित वाङ्फू नदीका साथै ग्वान्जावोको सन्यात्सेन मेमोरियल पार्कको समेत अवलोकन गरेको थियो । यसैगरी टोलीले चीनको स्यान्जेन, छिन्दु शहरको समेत अवलोकन गरेको संस्थाका निवर्तमान अध्यक्ष प्रेम भुजेलले जानकारी दिए । भ्रमणमा संस्थाका अध्यक्ष यामनाथ तिमिल्सिना, निवर्तमान अध्यक्ष प्रेम भुजेल, पूर्व अध्यक्ष जनकराज पराजुली, महासचिव नविन नापित, कोषाध्यक्ष जीवनप्रकाश श्रेष्ठ, सदस्य रामेश्वर अधिकारी, लेखनाथ पौडेल, अनिल सिग्देलका साथै साधारण सदस्यहरु चोकबहादुर गुरुङ, गोकुल श्रेष्ठ, भरत श्रेष्ठ, पोषराज पौडेल, कृष्ण तिमिल्सिना, विष्णु पौडेल, बाबुराम क्षेत्री, सुनिल क्षेत्री, हरिप्रसाद बराल, विक्रम खिचाजू, गजेन्द्र श्रेष्ठ, सूर्यकुमार राजभण्डारी लगायत सहभागी थिए ।
भ्रमण पूरा गरेर पोखरा फर्किएपछि संस्थाका अध्यक्ष यामनाथ तिमिल्सिनाले आफूहरुको भ्रमण महत्वपूर्ण, ऐतिहासिक र अविष्मरणीय रहेको बताए । उनले भ्रमणले व्यवसायीहरुबीच आत्मीयता बढाउन पनि ठूलो भूमिका खेल्ने विश्वास व्यक्त गरे ।
यसैगरी संस्थाका निवर्तमान अध्यक्ष प्रेम भुजेलले संस्थाले चीन भ्रमणको आयोजना गरेर रचनात्मक एवं महत्वपूर्ण काम गरेको बताए । उनले यस्ता भ्रमणलाई आगामी दिनमा पनि निरन्तरता दिनुपर्नेमा जोड दिए । संस्थाका कार्यसमिति सदस्य रामेश्वर अधिकारीले चीन भ्रमण अत्यन्तै फलदायी भएको भन्दै अध्ययन, अवलोकन र व्यवसायिक कामका लागि भ्रमण अत्यन्तै महत्वपूर्ण भएको बताए ।
Post a Comment