गोल्डेन न्यूज संवाददाता
नेपाली लोक संस्कृतिको अनुसन्धानका क्षेत्रमा क्रियाशील अमेरिकी नागरिक आना स्टरले नेपाल लोक संस्कृतिका क्षेत्रमा धनी रहेको बताएका छन् । स्वतन्त्र पत्रकार सङ्घ, नेपालले आइतबार पोखरामा आयोजना गरेको “लोकसंस्कृति सम्वद्र्धन तथा संरक्षण” विषयक अन्तक्र्रिया एवम् पत्रकार भेटघाट कार्यक्रममा उनले विविधतालेयुक्त नेपालमा धेरै महत्वपूर्ण संस्कृति रहेको बताए ।नेपाली लोक संस्कृतिको अनुसन्धानका क्रममा नेपालका विभिन्न गाउँ र बस्तीमा पुगेको स्मरण गर्दै स्टरले नेपाली लोकसंस्कृतिको संरक्षणको विषयलाई राज्यले प्राथमिकता दिनुपर्ने बताए । स्वतन्त्र पत्रकार सङ्घ नेपालका केन्द्रीय अध्यक्ष कृष्णप्रसाद बास्तोलाले नेपालको लोक संस्कृतिका क्षेत्रमा अमेरिकी अनुसन्धाता स्टरले गहन अध्ययन गरेको चर्चा गर्दै लोपोन्मुख लोक संस्कृतिको जगेर्नामा प्रत्येक नेपालीको एकताबद्ध प्रयास आवश्यक हुनेमा जोड दिए । कार्यक्रममा स्वतन्त्र पत्रकार सङ्घ, नेपालका महासचिव कमल पौडेल ‘अथक’ले पछिल्लो समयमा लोक संस्कृतिको क्षेत्र कमजोर बन्दै गएको बताउँदै यसको सवलीकरणका लागि जुट्नु आवश्यक भएको बताए । सञ्चारकर्मी शान्ति राणाले अमेरिकी नागरिक स्टरले नेपाली लोकसंस्कृतिका क्षेत्रमा गरेको अध्ययन अनुसन्धानले भूगोलका कारण कुनै पनि कला संस्कृति नछेकिने पुष्टि गरेको बताइन अमेरिकी नागरिक आना स्टरलाई नेपाली लोक संस्कृतिको अनुसन्धान र नेपाली लोक गायनमा क्रियाशील रहेको भन्दै अलि मिया लोकवाङ्मय प्रतिष्ठानले लोककवि अलि मियाको ९८औँ जन्मजयन्तीका अवसरमा शनिबार रु २० हजार नगदसहित सम्मानपत्र र दोसल्लाले पोखरामा सम्मान गरेको थियो ।
Post a Comment