हिन्दुराष्ट्रको माग गर्दै राप्रपा नेपाल कास्की क्षेत्र नं. २ ने सोमबार भजन कीर्तन सहित हस्ताक्षर संकलन अभियान गरेको छ । पोखराको केआइसिंहपुल र रामघाटमा हरिबोधनी एकादशीको रौनकसंगै भजनकीर्तन सहित गरिएको कार्यक्रममा करिब ४५ हजार हस्ताक्षर संकलन भएको छ । कार्यक्रमका संयोजक तथा जिल्ला उपाध्यक्ष नेत्रबहादुर बस्नेतले नेपाललाई हिन्दु राज्य घोषणा नगरिए त्यसको विरुद्ध सारा नेपाली उत्रिने चेतावनी दिए । क्षेत्र नं. २ कि अध्यक्ष गीता गुरुङले हिन्दु राष्ट्रको पक्षमा देशव्यापी लहर चलेकाले यसलाई कसैले रोक्न नसक्ने बताइन् । ८१ प्रतिशत हिन्दु धर्मालम्बी भएको देशलाई धर्म निरपेक्षता घोषणा गर्नु नेपालीको अस्तित्व निमिट्यान्न पार्न खोजिएको उनको आरोप थियो । हस्ताक्षरमा देखिएको उल्लासमय सहभागिताले आफूहरुलाई थप प्रेरित बनाएको नेतृ गुरुङले बताइन् । कार्यक्रममा कोषाध्यक्ष सर्मिला गुरुङ, सचिव निर्मल खत्री, जिल्ला सहसचिव रञ्जना सेन पौडेल, युवा नेता धमेन्द्र थापा, परमेश्वर बस्ताकोटी, निर्मल केसीले बोलेका थिए । त्यसैगरि मोतीमान शाक्य, पूजा शाह, रामबहादुर तामाङले पनि आफ्नो भनाई राखेका थिए । यसैगरी रामघाटमा आयोजित कार्यक्रममा इश्वरी वैरागी, दुर्गा अधिकारी, घनश्याम गौतमले बोलेका थिए ।
कार्यक्रममा ‘हाम्रो धर्म, हाम्रो राज्य प्राण भन्दा प्यारो छ’, ‘जातीयता चाहिँदैन, देश विखण्डन गर्न पाइँदैन’, ‘हिन्दु राज्य तत्काल घोषणा गर’ जस्ता नारा घन्काइएका थिए । दोहोरी गीत कलाकार बुद्धिमान गुरुङ धम्पुले दिनभर गीत तथा भजन किर्तन गाएका थिए । हिन्दु धर्मालम्बीहरुले हिन्दु राज्यको पक्षमा भजन किर्तन गाउँदा रौनकता छाएको थियो । हरिबोधनी एकादशी मान्न आएका धर्मालम्बीले धर्म जोगाउन कुनै कसुर बाँकी नराख्ने बताएका थिए ।
Post a Comment