बिहीबार रातिदेखि परेको भारी वर्षाका कारण सेती नदीमा बाढी आउँदा पोखराको रामघाटस्थित सुकुम्बासी बस्तीका २६ घर डुबानमा पर्नुका साथै ठूलो संख्यामा चौपाया र घर पालुवा पंक्षी मरेका छन् । राति करिब ३ बजेतिर बाढी आएपछि रामघाटको तल्लोभाग डुवानमा परेको थियो । त्यसपछि बिहान ५ बजेको समयमा सशस्त्र प्रहरी र नेपाल प्रहरीको करिब ४० जनाको टोलीले डुङ्गा प्रयोग गरी डुवानमा परेका घरबाट मानिसहरुलाई उद्धार गरेका थिए । डुवानका कारण रामघाटमा १३ वाख्रा, १०२ कुखुरा, १ गाइ, ८४ हास र ६० वटा बंगुर मर्नुका साथै लत्ताकपडा, भाँडा र अन्नपात क्षति भएको छ । बाढीका कारण त्यसक्षेत्रको ब्लकले बनेका पूर्ण परियारको एककोठे घर भत्किएको छ । मानबहादुर श्रेष्ठ, चन्द्रबहादुर कामी, मिने कामी, शिशिर कामी, सजिना कामी लगायतलाई प्रहरीले डुङ्गाको मद्धतले उद्धार गरेको थियो । बस्ती नै डुबानमा परेपछि स्थानीयले राति नै गुहार मागेका थिए । सेती नदीमा बाढी आएर नदी थुनिंदा रामघाटमा ताल बनेको र सुकुम्वासीवस्ती समेत डुवानमा परेको समाचार विभिन्न माध्यमबाट सार्वजनिक भएपछि दृश्य हेर्ने र दृश्य खिच्न पोखरेलीको ठूलो भीड लागेको थियो ।
यसैगरी कास्कीको लुम्ले गाविस ९ लान्द्रुकस्थित कृष्णप्रसाद सुवेदीको दुईवटा गोठ दुईसय मिटर माथिबाट आएको पहिरोले पुरेको छ । पहिरोले पुरिंदा गोठमा बाँधिएका भैंसी, जर्सी गाइ र गोरु गरी ६ वटा चौपाया मरेको र स्थानीय रामबहादुर बुढाथोकी, गोपाल सुवेदी, बेलबहादुर विक, देवा बिक, शेरबहादुर बिक, मैते बिक र कृष्णप्रसाद सुवेदीको घर समेत जोखिममा परेको कास्कीका प्रहरी प्रवक्ता केदार रजौरेले जानकारी दिए । बाढी पहिरोकै कारण लेखनाथ नगरपालिका वडा नं ४ अमलाचौर बस्ने कुलदीप बरालको कटेरो पुरिएको छ । पहिरोले गाईवस्तुलाई नपुरे पनि झन्डै रु चार लाख बराबरको क्षति भएको पीडित बरालले बताए । पहिरो बिहानपख गएकाले स्थानीय जनताको सहयोगबाट पन्छाई गाईवस्तुलाई जोगाइएको थियो । यसैगरी सार्दिखोला पुरुन्चौर जोड्ने मोटरेवल फलामे पुलको करिब ७ मिटर भुभाग बाढीले बगाएको छ ।
Post a Comment